Акафист святому равноапостольному Николаю, архиепископу Японскому
.png)
Акафист
святому равноапостольному
Николаю, архиепископу Японскому
Кондак 1
Избранный от родов российских на благовестив Христово в стране Японстей, душу свою полагал еси за отцы своя, утверждая их в вере истинней. Подвиги твоя почитающе, хвалим тя сице: Радуйся, равноапостольный святителю Николае, церкви Японская предстателю.
Икос 1
Ангел, яко Товии, спутешествовал тебе, егда в младая лета своя направил еси стопы в страну сию, далече отстоявшую. Сего ради вопием ти сице: Радуйся, Смоленские земли славное порождение. Радуйся, от младенчества церковь возлюбивый. Радуйся, в сиротстве Богоматерию Смоленскою Одигитриею не оставленный. Радуйся, духовной наукою умудренный. Радуйся, на бдении всенощном путь свой предузнавый. Радуйся, сладость мира ни во что же вменивый. Радуйся, чина ангельского и иерейского удостоенный. Радуйся, проповедати Евангелие вожделевый. Радуйся, к неведащим спасение жалости исполненный. Радуйся, и дальних, яко ближних возлюбивый. Радуйся, гонения за веру не страшивыйся. Радуйся, равноапостольный святителю Николае, церкви Японския предстателю.
Кондак 2
Видяще подвиги святителя Иннокентия, богомудраго просветителя Сибирского и Алеутского, поревнова равноапостольный ему, зовый: Аллилуия.
Икос 2
Разуме в смирении явил еси, святче, Господу моляся о даре языков: како проповедаю народу чуждему; како отверзу уста неискусная; слышаще твоя словеса боголюбная, паству твою на наречии исконном ея поучающая, хвалим тя сице: Радуйся, любовию Христовою побеждавый. Радуйся, окормлявый духовныя младенцы. Радуйся, супротивников в чада преложивый. Радуйся, крещением их грехи омывый. Радуйся, познанием веру укреплявый. Радуйся, наставниче добрый и рачительный. Радуйся, пресвитеров Японских поставивый. Радуйся, церковного чина устроителю. Радуйся, и нашего отечества защитниче. Радуйся, согласия братского поборниче. Радуйся, светильниче веры Православныя. Радуйся, равноапостольный святителю Николае, церкви Японския предстателю.
Кондак 3
Сила Вышняго осени и укрепи тя, отче, егда пришел еси в страну языческую, смертию сынов своих казнящую за принятие святого крещения. Ты же, ниву прозревая Божию, вопиял еси: Аллилуия.
Икос 3
Имый любовь нелицемерную, мнил страну сию быти невестою украшенную, жениха на браке ожидающею, ибо ведала она обручение, кровию мучеников древле обагренная, просиявшая старцы и женами распятыми, и детьми Христа исповедавшими. Почитающи неложное твое упование, прославляем тя сице: Радуйся, святителю духовный. Радуйся, силою Креста укрепленный. Радуйся, столпе непоколебимый. Радуйся, пастырю небоязненный. Радуйся, разуме несмущаемый. Радуйся, проповедниче немолчный. Радуйся, никого не осудивый. Радуйся, и сам не осужденный. Радуйся, исповедников сопричастие. Радуйся, молитвенниче верный. Радуйся, любимче ангела хранителя. Радуйся, равноапостольный святителю Николае, церкви Японския предстателю.
Кондак 4
Бурю возбудиша идолослужителие, не терпящие духа христианскаго, видяще, како церковь созидается. Ты же радуяся терпению чад своих, заключенных в подземелиих темничных, купно с ними возглашаше: Аллилуия.
Икос 4
Слышаше, яко учение Христово вся народы объемлет и приемлет их равночестно, и яко обители им многи Господь уготовал, притекаху к тебе мужие и жены, отроцы и старцы, пастырю добрый, тем же и мы хвалим тя сице: Радуйся, малое стадо Христово собравый. Радуйся, тесным путем к Богу его приводяй. Радуйся, церковь Акилы с Прискиллой в подражание приявый. Радуйся, церкви домашния зде утвердивый. Радуйся, общия трапезы благословивый. Радуйся, верных своих не оставлявый в бедах. Радуйся, сильным сыном поручавый слабейших. Радуйся, слабых державый отеческою дланию. Радуйся, сеявый мудро на ниве Христовой. Радуйся, строивый церковь на камени твердом. Радуйся, рабе усердный, не скрывый таланта. Радуйся, равноапостольный святителю Николае, церкви Японския предстателю.
Кондак 5
Боготечною звездою явился еси, отче, солнцу правды пламенно служа и ко Господу приводя верных, яко древле звезда Вифлеема. Светоносно тобою облечаеми, вопием Христу: Аллилуия.
Икос 5
Видев капища идольския и пагоды буддийския, плача, молящеся праведный: где созижду церковь Тебе, Господи; и бысть услышана уст твоих молитва: Радуйся, яко елень на источницех водных. Радуйся, храм Воскресения Христова воздвигий. Радуйся, Крест утвердивый над градом стольным. Радуйся, звон колокольный вознесый до небесе. Радуйся, пламень гопения на христиан угасивый. Радуйся, доброе имя стяжавый в людех Японских. Радуйся, древним обычаем не поругавыйся. Радуйся, друга и брата в народе Японстем обретый. Радуйся, светоносителю, посланный Богом. Радуйся, домоправителю господа верный. Радуйся, ныне увенчанный славою небесною. Радуйся, равноапостольный святителю Николае, церкви Японския предстателю.
Кондак 6
Проповедницы святого Евангелия радуются в горних чертозех, приемлюще тя, яко собрата. Мы же, сродницы твои, милость узревши таковую, Богу воспоим: Аллилуия.
Икос 6
Возсиявый от земли Смоленския, со святыми земли Российския сочетаваешися: се святитель Димитрий Ростовский, цевница духовная: се Задонская похвало Тихоне, собиратель сокровища умнаго, се Стефан, просветитель Пермский: Сергий, Серафим, Зосима и Савватий, утешение Российское: се святии, тайнии и явленнии, Отечества нашего Божественное сияние. Мы же, великия радости исполнени, прославляем нового угодника: Радуйся, сыне сельского диакона. Радуйся, убожество в младости познавый. Радуйся, обет нестяжания принесый. Радуйся, иночество до смерти соблюдый. Радуйся, архипастырю в ризах многошвенных. Радуйся, в убогих келиях пребывавый. Радуйся, в миру мирского не искавый. Радуйся, наставниче новопросвещенных. Радуйся, крестителю рыбарей Аинских. Радуйся, дошедый до пределов дальних. Радуйся, сподвижников в школе возрастивый. Радуйся, равноапостольный святителю Николае, церкви Японския предстателю.
Кондак 7
Хотяй от земли в горняя преселитися, блаженный рече: что ми тело сие, немощми томимое, аще не могу работати Господеви; храмину сию оставляю, взывая: Аллилуия.
Икос 7
Новое торжество в стольнем граде японстем: празднова Пасху святитель в церкви токийской соборней, и познаша людие японстии истинную Пасху спасительную. Мы же, поминающе сей день, вопием велегласно: Радуйся, в веце жестоцем любовь сохранший. Радуйся, архитриклине церковнаго пира. Радуйся, старче, очима не даваяй дремания. Радуйся, отче, сретаяй чада целованием. Радуйся, чада своя поставлявый пред Богом. Радуйся, Духа стяжавый в трудех повседневных. Радуйся, зревый плоды своих рук при исходе. Радуйся, семя горушное бросивый в землю. Радуйся, древо прекрасное нам завещавый. Радуйся, мосте живый Христианского Мира. Радуйся, ангельски радуяйся в день Воскресения Христова. Радуйся, равноапостольный святителю Николае, церкви Японския предстателю.
Кондак 8
Странная видяще, како японская чада Христовы воином русским плененным братски служаху, Господу песнь воспоим: Аллилуия.
Икос 8
Весь был предан еси на служение Богу, людем такожде служа непрестанно обоя заповеди сочетая. Царский путь твой умиленно прославляем сице: Радуйся, умный Богу служитель. Радуйся, архирейски жертву приносяй за народы. Радуйся, пленных русских попечителю. Радуйся, в грозе военной чад своих не оставивый. Радуйся, отечествию исконному верность сохранивый. Радуйся, наставниче милости и мужества. Радуйся, уцеломудривший души соблазненныя. Радуйся, пристанище отверженных. Радуйся, сокровище смирения. Радуйся, чертоже покаяния. Радуйся, любы не победимая. Радуйся, равноапостольный святителю Николае, церкви Японския предстателю.
Кондак 9
Всякое древо по плоду познается. Плод же трудов твоих многих бысть спасение многих людей. Посему возгласим: Аллилуия.
Икос 9
Ветии многовещанныя подвигом твоим изумляются, ангели с тобою ликовствуют. Мы же, ведяще смиренное житие твое и терпение многомощное, хвалим тя сице: Радуйся, не древле, а ныне подвизавыйся. Радуйся, образе архипастыря православного. Радуйся, глубокое наше обличение. Радуйся, Христа базгрешное исповедание. Радуйся, благоразумия мера истинная. Радуйся, сокровище, в духе собираемое. Радуйся, сокровище для ближних расточаемое. Радуйся, приемляй мзду тысячекратную. Радуйся, безсмертныя радости исполненный. Радуйся, борения наша утешаяй. Радуйся, моления отечески приемляй. Радуйся, равноапостольный святителю Николае, церкви Японския предстателю.
Кондак 10
Спасти потщился люди отчаянныя, истинного Бога не ведящия. Ныне в сени смертней свет узревший, чада твоя вопиют: Аллилуия.
Икос 10
Стена еси Богородица Дево: тепле молился святитель, церковь свою утверждая. Яко на острове обуреваемом, среди иноверных, пребывала она без щита ограждения. Мы же, узревше ея крепость и верность, поем ти сице: Радуйся, церковь надежным покровом укрывый. Радуйся, Матери Божией предав обращенных. Радуйся, отроковиц научивый молитися. Радуйся, свете целомудрия девам внушавый. Радуйся, браком честным освящавый японские семьи. Радуйся, правых суждений святое зерцало. Радуйся, мир приносивый селением и градом. Радуйся, в нуждах своих укреплявыйся верою. Радуйся, старцу отцу помогавый до смерти. Радуйся, в мире пожив, но от мира свободный. Радуйся, по кончине всеми оплаканный. Радуйся, равноапостольный святителю Николае, церкви Японския предстателю.
Кондак 11
Пение всякое подвигом твоим побеждается, святителю, коим словом обымем апостольское твое служение; речем же с тобою: Аллилуия.
Икос 11
Светоприемно церковь Японская прия благовестив на наречии своем от труда твоего, просветителю истинный. Уподобился еси вселенским учителем, обращая любомудрия словеса твоя на служение горней мудрости. Почитающе доброделание твое, хвалим тя сице: Радуйся, Священное Писание уразумевый. Радуйся, чадом человеческим его предавый. Радуйся, достойная речения находивый. Радуйся, неверная и лестная отметавый. Радуйся, соборный труд свой с церковию мысливый. Радуйся, блаженно от трудов почивый. Радуйся, к народу приближавый слово. Радуйся, богослужение на наречии отеческом Японстей церкви даровавый. Радуйся, отвергни вся хитросплетения. Радуйся, питавый и млеком и медом. Радуйся, смиривый гордость лжеименных. Радуйся, равноапостольный святителю Николае, церкви Японския предстателю.
Кондак 12
Благодать почила на тебе, являющи святость твоего служения. Аще и чудес не совершал еси, якоже и Иоанн Креститель, паче же свидетельство и твое церковь новозданная. Чудом Божиим в дни последния утвержденная, да единым сердцем с нею воспеваем: Аллилуия.
Икос 12
Поюще прославление твое и к лику святых пречисление сродниче наш и пастырю, хвалим тя сице: Радуйся, святостию твоею церковь в последния дни утвердивый. Радуйся, муки земныя забвение. Радуйся, благодати тихое веяние. Радуйся, прибегавших к тебе помощнице. Радуйся, подвизающихся сподвижниче. Радуйся, садовниче благий и цветоблюстителю. Радуйся, нестроения наша исправляяй. Радуйся, стетаяй чад своих в райских обителях. Радуйся, поминающих тя поминаяй. Радуйся, бурного моря отишие. Радуйся, звездо закатная и восточная. Радуйся, равноапостольный святителю Николае, церкви Японския предстателю.
Кондак 13
О пресвятый и пречудный, преславный и предивный просветителю страны Японския, присный молитвенниче наш пред престолом Святыя Троицы, святый равноапостольный святителю отче Николае! Приими нынешнее приношение наше и умоли Спасителя Бога и Его Пречистую Матерь, да твоим ходатайством просветит Православием обращенный тобою народы и страну нашу Российскую; и избавит нас от всяких напастей врагов видимых и невидимых, пагубы и крамолы, бед и скорбей, и даст грехов оставление, и вечных мук избавление, и Царства Небеснаго сподобит, да купно с тобою и всеми святыми Троице Святей во веки веков поем: Аллилуия, Аллилуия, Аллилуия.
(Этот кондак читается трижды, затем икос 1 и кондак 1)
.png)
Молитвы святому равноапостольному Николай, архиепископу Японскому
Молитва первая
О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святый святителю, равноапостольный Николае Японский. Предстоя у престола всех Царя и наслаждаяся света единосущныя Троицы и херувимски со ангелы возглашая песнь трисвятую, великое и неизследованное дерзновение имея ко всемилостивому Владыце, моли спастися обращенным тобою ко Христу, и всея паствы Христовой людем. Упроси Вышняго, страждущую страну Российскую от лютых безбожников и власти их Господь да освободит, верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш, процветание Православия в стране нашей Российстей и в земли Японстей да утвердит: архиереи благолепием святительства да украсит, монашествующия к подвигам добраго течения да укрепит: царствующия грады и вся грады страны добре сохранит. О святителю предивный! Мир весь предстательством твоим умири: от глада, жажды, пагубы и крамолы избави ны, от стихий часто находящих на ны, грех ради наших многих, от тлетворных ветр, губительных язв и от нападения иноплеменных сохрани. Старые утеши, юные настави, безумныя умудри, вдовицы помилуй, сироты заступи, младенцы возрасти, плененныя и в темнице седящия свободи и возврати. Немощствующия исцели, плавающим буди добрый кормчий, и всех везде тепле призывающих тя и с верою притекающих к тебе, и усердно припадающих, и молящихся тебе от клеветы и всяких напастей, враг видимых и невидимых, бед и всякого зла твоим ходатайством свободи. Моли о нас Всещедраго и Человеколюбиваго Христа Бога нашего, да простит нам вся грехи, от юности соделанныя нами, и в день страшного пришествия Его от шуйяго стояния избавит нас и радости святых причастники сотворит, да купно с ними славим Единого в Троице Бога, Отца и Сына и Святаго Духа, во веки веков. Аминь.
Молитва вторая
О Всепетая Мати. Богородице Смоленская, Одигитрие. Ты еси привела равноапостольного святителя Николая во удаленныя пределы японский проповедати Евангелие сына Твоего возлюбленного. Се исполнил той волю Твою, Владычице. Простри руку Твою благословляющую на рабы Твоя, чада им обращенный, и на нас, во гресех пребывающих, да его молитвами сохраним православную веру во веки веков. Аминь.
.png)
Тропарь, глас 4
Апостолов единонравне и сопрестольне, служителю Христов верный и Богомудрый, цевнице избранная Божественнаго Духа, сосуде преизливающийся любве Христовы, Японския земли просветителю, святый Николае, иерарше равноапостольне, молися Живоначальней Троице о всем твоем стаде и о всем мире.
Кондак, глас 4
Странника и пришельца прият тя страна Японская, равноапостольне святителю Николае, в ней же исперва познал еси себе яко чуждаго, обаче теплоту и свет Христов источая, прелагал еси враги твоя в сыны духовныя, имже раздая благодать Божию, созидал еси Церковь Христову, о ней же ныне молися, и тебе бо сынове ея и дщери взывают: радуйся, пастырю добрый наш.
Святой равноапостольный Николай, архиепископ Японский-Жми сюда
Видео о Св.Николае Японском-Жми сюда
Назад к списку